یمن کی جنگ کے خاتمے تک سعودی عرب کے ساتھ ہیں : امارات

یمن کی جنگ کے خاتمے تک سعودی عرب کے ساتھ ہیں : امارات

متحدہ عرب امارات کے وزیر مملکت برائے خارجہ امور انور قرقاش نے اس بات پر زور دیا ہے کہ عرب اتحاد کی جانب سے جنگ کے خاتمے کا اعلان کیے جانے تک یمن میں سعودی عرب کے ساتھ امارات کا کردار جاری و ساری ہے۔ سرکاری ایجنسی کے مطابق قرقاش کا کہنا ہے کہ "کویت میں یمن کے سامنے موجود موقع دوبارہ آنا مشکل ہے تاہم مذاکرات کے 50 روز گزر جانے کے بعد بھی یمنی فریقوں کی جانب سے ابھی تک سامنے آنے والی کارکردگی حوصلہ افزا نہیں ہے اور حوثی اور صالح بغاوت سے پیدا ہونے والے عدم اعتماد کا خلاء پُر نہیں ہوسکا۔ مستقبل کے حوالے سے مشترکہ ویژن یمنیوں کو اکٹھا نہیں کر رہا ہے۔ انور قرقاش کا کہنا تھا کہ "ہماری مسلح افواج نے لڑائی میں اپنا کردار بہادری اور پیشہ ورانہ طور سے ادا کیا۔ عرب اتحاد کی جانب سے جنگ کے خاتمے کا اعلان کیے جانے تک برادر ملک سعودی عرب کے ساتھ یہ کردار جاری رہے گا"۔ انہوں نے مزید کہا کہ "عسکری اور سیاسی سیاق میں ریاض کے شانہ بشانہ امارات کا کردار بھی ایک سچے حلیف کے طور پر باقی رہے گا۔ یمن کے بحران سے مضبوط ہونے والی یہ شراکت مستقبل کے لیے ایک بنیادی ستون ہے"۔